हलेसीन्युजडेस्क, खोटाङ

खोटाङमा डढेलोका कारण आज पनि बस्तिका केही घरहरु जलेर नष्ट भएको दुःखद समाचार प्राप्त भएका छन् । हलेसी तुवाचुङ नगरपालिका–५ दुर्छिम मयाँखुस्थित लालिगुराँस सामुदायिक वनमा लागेको अत्यासलाग्दो डढेलो अनियन्त्रित भई नजिकै बस्तिका केही घरहरुलाई खरानी बनाइदिएको हो । 

मंगलवार मध्यान्ह अन्दाजी १२.३० वजेदेखि जंगलमा लागेको डढेलो फैलदै मानववस्तिमा समेत झिल्कोले भेट्दा दुर्छिम मयाँखुका विनोद राई, चौकीराज राई र कृष्ण बहादुर खत्रीको घर जलेर नष्ट बनेको छ ।

विनोदको घरमा आगलागी हुँदा घरसँगै घरभित्रको अन्नपात, लत्ताकपडा, भाडावर्तन जल्दा छ लाख बराबरको क्षति पुगेको छ भने चौकीराजको घर, घरभित्रको अन्नपात, लत्ताकपडा, भाडावर्तन जल्दा आठ लाख बराबरको क्षति भएका जनाइएको छ । आगलागीका कारण चौकीराजको गोठघरमा बाँधिएको भैसीको एकवटा पाडो जलेर घाईते भएको छ भने एकवटा सुँगुर पूर्णरुपमा जलेको बताइन्छ ।

दुर्छिमकै कृष्ण बहादुरको बसोबास नरहेको दुई तले दुईवटा घर पूर्णरुपमा जल्दा ३ लाखको क्षति भएको प्रहरीले जनाएको छ । 

यता खोटेहाङ गाउपालिको वडा नं. १ लिुकुवापोखरीमा पनि जंगलको डढेलो फैलदै नजिकै बस्तिको एउटा घरलाई क्षति पुराएको थाहा भएको छ । लिकुवापोखरी मुलाबारीस्थित लिकुवापोखरी सामुदायिक वनमा लागेको डढेलो अनियन्त्रित हुँदा सोही ठाउँका टंकनाथ तिमिल्सिनाको एक तले घर र गोठ जलेको हो । मंगलबार अपरान्ह ३ः३० बजे लागेको डढेलोले तिमिल्सिनाका घर, घरभित्रको अन्नपात, लत्ताकपडा, भाडावर्तन, नगद रु.१८ हजार, गोठ र गाई जलेर नष्ट हुँदा सात लाख ८५ हजार वरावरको क्षति भएको जनाइएको छ ।

[ यो पनि---सप्तेश्वर छितापोखरीका अग्निपीडित परिवारलाई राहत सामाग्री प्रदान }