हलेसीन्युजडेस्क, खोटाङ

खोटाङ जिल्लामा  लम्पी स्किन रोगका कारण घरपालुका पशुचौपाय धमाधम मर्न थालेका छन् । जिल्लाको आठ गाउँपालिका र दुई नगरपालिकामा लम्पी स्कीन महामारीले पशुचौपाया विरामी भै मर्दा अहिले सम्म सबै भन्दा बढी रावाबेसी गाउँपालिकाका किसानहरु पिडित बन्नु परेको भेटनरी अस्पताल तथा पशुसेवा विज्ञ केन्द्र उदयपुरको सम्पर्क कार्यालय दिक्तेलका भेटनरी डाक्टर ब्रजेस यदबले बताउनु भयो ।  

असार महिनाको २१ गते देखि २७ गते सम्मको तथ्यांक हेर्दा  सबै भन्दा बढी  रावाबेसी गाउँपालिकामा २१० वटा लम्पी स्किनबाट गाई गोरु बिमारी भएका छन् भने २२ वटाको मृत्यु भएको छ । हलेसी तुवाचुङ नगरपालिकामा ४४ वटा बिमारी र १ वटा मृत्यु भएको छ । 

त्यस्तै  दिक्तेलरुपाकोट मझुवागढी नगरपालिकामा १६० वटा बिमारी भएका छन् भने १५ वटाको मृत्यु भएको छ । बाराहापोखरी गाउँपालिकामा १२३ वटा गार्ई गोरु  बिमारी भएको छन् भने ८ वटाको मृत्यु भएको छ । खोटेहाङ गाउँपालिकामा १५३ वटा बिमारी भएका छन् भने ३ वटाको मृत्यु भैसकेको छ । दिप्रुङ चुर्ईचुम्मा गाउँपालिकामा ११९ वटा गार्ईगोरु बिमारी छन भने ७ वटाको मृत्यु भएको छ । साकेला गाउँपालिकामा.४३ वटा पशु बिमारी छन् भने ४ वटाको मृत्यु भएको छ ।

यसैगरी केपिलासगढी गाउँपालिकामा २२ वटा गार्ईगोरुमा संक्रमण देखिएको छ भने ५ वटाको मृत्यु भैसकेको छ । ऐसेलुखर्कमा १७२ वटा पशु बिमारी छन् भने १४ वटाको मृत्यु भएकोछ । जन्तेढुङगा गाउँपालिकामा १४० वटा बिमारी छन् भने २ वटाको मृत्यु भएको कार्यालय श्रोतले जनाएको छ ।  जिल्लाभर ११ सय ७९ पशुहरु लम्पी स्किनबाट संक्रमित भएका छन् भने जम्मा ९१ वटा पशुको मृत्यु भएको तथ्यांक प्राप्त भएको छ ।

केही पशुहरु संक्रमणमुक्त भएपनि धेरैजसो पशुहरु विरामी परेको पशु प्राविधिकहरुले बताएका छन् । यो रोगको नियन्त्रण गर्न विशेष औषधी नभएपनि भ्याक्सिन तथा एन्टिबाइटिक प्रयोग गरिरहेको प्राविधिकहरुको भनाई छ ।  भेटनरी डाक्टर ब्रजेस यदबका अनुसार यस्ता रोगको संक्रमण लागेका पशुहरुलाई उच्च ज्वरो आउने, नलिका ग्रन्थ सुनिने, शरीरमा गिर्खा र डल्लाहरु आउने हुन्छ । यस्तो खटिराहरु नाक मुख, शरीर, घाँटी र थुनमा धेरै आउँछ । घाउहरु बिस्तारै दुख्दै जाने, घाउ पाक्ने, अल्सर हुने हुन्छ । संक्रमणका कारण दूध उत्पादन घट्ने र संक्रमित पशुको मृत्यु नै हुने बताइन्छ । यो रोग रगत चुस्ने किरा प्रजातिबाट एक पशुबाट अर्को पशुमा सर्ने लामखुट्टे, भुसुना, किर्ना, रगत चुस्ने झिंगाबाट फैलिएको उहाँको भनार्ई छ ।

यो रोगको नियन्त्रणका लागि स्थानीय, प्रदेश र केन्द्र तहका सरकारको ध्यानाकर्षण गराउदै आए पनि यसका लागि प्रभावकारी कदम चाल्न नसकेको आम किसानहरुको गुनासो सुनिन्छ ।