हलेसीन्युजडेस्क, खोटाङ /

अशोज २९ / खोटाङको दिक्तेल रुपाकोट मझुवागढी नगरपालिकाका नगरप्रमुख तीर्थराज भट्टराईले आफ्नो गाउँ, टोल र बस्तीहरूमा आ–आफ्नो पहलबाट विकास निर्माणमा जुट्न नगरवासीहरूलाई आह्वान गर्नुभएको छ।

उहाँले बुधवार सामाजिक सञ्जालमार्फत “आफ्नो गाउँ आफैं बनाऔं – समृद्ध र सभ्य समाज बनाऔं” भन्ने सन्देश प्रकाशित गर्दै विगतका पुस्ताले श्रमदानमार्फत सडक, खानेपानी, विद्यालय भवन, स्वास्थ्य चौकी लगायतका पूर्वाधार निर्माण गरेको ऐतिहासिक योगदान स्मरण गर्नुभएको छ।

नगरप्रमुख भट्टराईका अनुसार पछिल्लो समयमा नगरभित्रका नागरिकहरू सामूहिक रूपमा सडक निर्माण, सरसफाइ, खानेपानी लगायतका काममा स्वेच्छिक रूपमा जुटिरहेका छन्। उहाँले कसैले प्रचारबिना कर्तव्यबोधका साथ काम गरिरहेको र कसैले सामाजिक सञ्जालमार्फत चेतना जगाउने काम गरिरहेको भन्दै सबैप्रति धन्यवाद ज्ञापन गर्नुभएको छ।

उहाँ अगाडि भन्नुहुन्छ — “जसले स्वयं सहभागी भएर पसिना बगाउँदै विकासमा योगदान पु¥याइरहनुभएको छ, ती सबैलाई हार्दिक धन्यवाद र सम्मान व्यक्त गर्दछु। देश–विदेशमा रहेर पनि विभिन्न माध्यमबाट समर्थन र सुझाव दिनुभएकालाई पनि धन्यवाद दिन चाहन्छु।”

नगरप्रमुख भट्टराईले नगर विकासका क्रममा प्राथमिकतामा केही उतारचढाव हुन सक्ने स्वीकार गर्दै निर्वाचनका क्रममा गरिएको सबै प्रतिबद्धता तुरुन्त पूरा हुन नसकेकोमा क्षमाप्रार्थी हुँदै नगरका स्रोत र साधन अनुसार क्रमशः पूरा गर्ने प्रतिबद्धता जनाउनुभएको छ।

उहाँले थप भन्नुभयो — “हामीले गरेको काम हाम्रै लागि हो, अरूका लागि होइन। सबै मिलेर साझेदारी र हातेमालो गरौं।” उहाँले नगरवासीहरूबाट तिरेको कर पारदर्शी रूपमा खर्च भएको बताउँदै एक रुपैयाँ पनि आँखा छलेर वा मिलेमतो गरेर दुरुपयोग नगरिएको स्पष्ट पार्नुभयो।

भट्टराईले अनावश्यक राजनीतिकरण र सामाजिक सञ्जालमा भ्रम फैलाउने प्रवृत्तिबाट टाढा रहन आग्रह गर्दै सकारात्मक सोचसहित एकआपसमा सहकार्य गर्न अनुरोध गर्नुभएको छ। उहाँले भ्रष्टाचार र अनियमिततामुक्त शासनका लागि आफ्नो बुद्धि र विवेकले भ्याएसम्म ईमानदार जनप्रतिनिधि बन्ने दृढता व्यक्त गर्नुभएको छ।

उहाँ अन्तमा लेख्नुहुन्छ — “हामी सबै मिलेर सामूहिक ढंगले विकास निर्माणमा साझेदारी गरौं। नगरपालिकाको तर्फबाट सधैं सकारात्मक, सृजनात्मक र सहभागी कार्य गर्ने विश्वास दिलाउन चाहन्छु।”