हलेसीन्युजडेस्क, खोटाङ

खोटाङको दिक्तेल रुपाकोट मझुवागढी नगरपालिकालाइ नेपालका लागि भारतीय राजदूतावास काठमाडौंले एम्वुलेन्स प्रदान गरेको छ । नेपालका विभिन्न जिल्लाका स्वास्थ्य र शिक्षाको क्षेत्रमा काम गर्ने संघ/संस्था र स्थानीय तहलाई एम्वुलेन्स तथा स्कुल वस प्रदान गर्ने क्रममा आइतवार भारतीय दुतावासले खोटाङको दिक्तेल रुपाकोट मझुवागढी नगरपालिकालाई एम्वुलेन्स प्रदान गरेको हो ।

नेपालका लागि भारतका राजदूत नवीन श्रीवास्तवको रोहवरमा  शिक्षा, विज्ञान तथा प्रविधिमन्त्री अशोककुमार राईले एक समारोहका वीच  दिक्तेल रुपाकोट मझुवागढी नगरपालिकाका नगरप्रमुख तीर्थराज भट्टराईलाई एम्वुलेन्सको चावी हस्तान्तरण गर्नुभएको थियो ।

काठमाण्डौँस्थित भारतीय दुतावास लैनचौरमा आयोजित समारोहमा विभिन्न जिल्लाका नगरपालिकाका प्रमुख, उपप्रमुख, गाउँपालिका अध्यक्ष, लाभग्राही संस्थाका प्रतिनिधि, राजनीतिक दलका प्रतिनिधि, नेपाल सरकारका पदाधिकारी, समाजसेवी आदिको उपस्थिति थियो ।

दूतावासले विज्ञप्तिमार्फत नेपालको स्वास्थ्य तथा शिक्षा क्षेत्रको उच्च प्राथमिकतालाई ध्यानमा राख्दै भारत सरकारले सन् १९९४ यता भारतको स्वतन्त्रता दिवस र गणतन्त्र दिवसको अवसरमा नेपालका विभिन्न क्षेत्रका लाभग्राही संस्थालाई एम्बुलेन्स तथा स्कुल बस उपहारस्वरुप प्रदान गर्दै आएको जनाएको छ ।

हस्तान्तरण कार्यक्रममा बोल्दै राजदूत श्रीवस्तवले उक्त एम्बुलेन्स तथा स्कुल बसको हस्तान्तरण स्वास्थ्य तथा शिक्षाको क्षेत्रमा पूर्वाधार विकास गर्न नेपाल सरकारले गरेका प्रयासलाई थप बलियो बनाउन नेपाल–भारत विकास साझेदारी कार्यक्रमअन्तर्गत भारत सरकारको लामो समयदेखिको परम्परा रहेको बताउनुभयो । उहाँले यो कार्यक्रम भारत र नेपालबीचको बलियो विकास साझेदारीकै एक अंशको रुपमा रहेको जानकारी दिनुभयो । 

मन्त्री राईले भारत सरकारको सहयोगमा नेपालमा जारी विकास परियोजनाको प्रशंसा गर्नुभयो । उहाँले ती परियोजनाले दुई देशबीचको जनता–जनताबीचको सम्पर्क र द्विपक्षीय सम्बन्धलाई निरन्तर सुदृढ बनाउदै लैजाने बताउनुभयो । मन्त्री राईले नेपालको हिमालदेखि तराईसम्मका विद्यालय तथा स्वास्थ्य संस्थालाई सहयोग गरेकोमा भारत सरकारको प्रशंसा गर्नुभयो ।

भारतीय राजदुतावासले हिजो विभिन्न स्थानीय तह तथा विध्यालय एवं संघसंस्थाहरुलाई ३४ वटा एम्बुलेन्स र ५० वटा स्कुल बस प्रदान गरेको हो ।

सन् १९९४ यता भारतले हालसम्म नेपालका विभिन्न जिल्लामा रहेका विभिन्न संघ/संस्थालाई ९७४ वटा एम्बुलेन्स र २३४ वटा स्कुल बस उपहारस्वरुप उपलब्ध गराएको दूतावासले जनाएको छ ।