हलेसीन्यूज डेस्क, खोटाङ –

मंसिर १८, बिहीबार / खोटाङको साकेला गाउँपालिका अध्यक्ष श्री रवि प्रकाश राईले अपाङ्गता भएका नागरिकलाई आत्मनिर्भर बनाउँदै समाजमा सम्मानपूर्वक जीवनयापन गर्न सक्षम बनाउने उद्देश्यसहित वडा नं. ५ मात्तिमबिर्तामा हालै गठन भएको मिलिजुली समूहलाई रु. १५ हजार नगद सहयोग प्रदान गर्ने घोषणा गर्नुभएको छ ।

अध्यक्ष राईले मंसिर १७ गते (बुधबार) ३४औँ अपाङ्गता दिवसको अवसरमा अपाङ्गता रोकथाम तथा पुनस्थापना कार्यक्रमअन्तर्गत सहायक सामग्री वितरणका क्रममा आयोजना गरिएको विशेष कार्यक्रममा उक्त घोषणा गर्नुभएको हो । उहाँले आफूले पाउँदै आएको सेवासुविधाबाट उक्त रकम सहयोगस्वरूप प्रदान गर्ने प्रतिवद्धता जनाउनुभयो ।

सो अवसरमा अध्यक्ष राईले यसअघि वडा नं. २ रतन्छा, वडा नं. ३ खिदिमा र वडा नं. ४ मात्तिममा गठन भएका मिलिजुली समूहलाई पनि प्रत्येक समूहलाई १५–१५ हजार रुपैयाँ उपलब्ध गराउने घोषणा गरिसकिएको जानकारी गराउनुभयो ।

समूहहरूले प्राप्त गर्ने रकम आफ्नै कोषमा राखी अपाङ्गता भएका व्यक्तिहरूको जीविकोपार्जन, सीप विकास तथा आयआर्जन सुधारका लागि उपयोग गरिने समूहको योजनामा उल्लेख गरिएको छ ।

कार्यक्रममा अध्यक्ष राईले अपाङ्गता भएका नागरिकलाई लाठ्ठी (छडी), श्रवणयन्त्र, कुइनो–वैशाखी र ह्वीलचेयर लगायतका सहायक सामग्री हस्तान्तरण गर्नुभएको थियो । उहाँका अनुसार गाउँपालिकाले अपाङ्गता भएका नागरिकका समस्या समाधानमा पूर्ण संवेदनशीलताका साथ काम गरिरहेको छ ।

“अपाङ्गता भएका नागरिकप्रतिको व्यवहार अब दया वा रहरको दृष्टिकोणबाट होइन, अधिकारमा आधारित समावेशी शासनतर्फ उन्मुख हुनुपर्छ,” अध्यक्ष राईले भन्नुभयो । उहाँका अनुसार राज्यका नीति–कार्यक्रमदेखि व्यवहारसम्म अपाङ्गता भएका व्यक्तिको मर्यादा, सम्मान र आत्मविश्वासलाई केन्द्रमा राख्न सके मात्र समाज सभ्य र संवेदनशील बन्छ ।

साकेला गाउँपालिकामा २०८० माघ १ गतेदेखि सामाजिक विकास मन्त्रालय (कोशी प्रदेश), साकेला गाउँपालिका र करुणा फाउण्डेसनको त्रिपक्षीय लागत साझेदारीमा अपाङ्गता रोकथाम तथा पुनस्थापना कार्यक्रम सञ्चालन हुँदै आएको छ । कार्यक्रम २०८३ पुस मसान्तसम्म सञ्चालन हुनेछ भने त्यसपछि गाउँपालिकाले आफ्नै स्रोतमा निरन्तरता प्रदान गर्ने योजना अध्यक्ष राईले उल्लेख गर्नुभयो ।