हलेसीन्यूजडेस्क, खोटाङ ।

मंसिर ७ / खोटाङको साकेला गाउँपालिकाका अध्यक्ष रविप्रकाश राईले देश वर्तमान जटिल राजनीतिक तथा सामाजिक अवस्थाबाट गुज्रिनुमा नेतृत्व तहमा रहेको स्वार्थकेन्द्रित सोच नै प्रमुख कारण भएको टिप्पणी गर्नुभएको छ । साकेला माध्यमिक विद्यालय, मात्तिमबिर्ताको ७१औँ वार्षिकोत्सव समारोहमा प्रमुख अतिथिको रूपमा बोल्दै उहाँले देशको अवस्थाबारे गम्भिर चिन्ता व्यक्त गर्नुहुँदै वास्तविकता स्वीकारेर सुधारका कदम चाल्न सबै सम्बद्ध पक्षलाई आह्वान गर्नुभयो ।

“आजको जटिल अवस्था बाह्य कारणले मात्र सिर्जना भएको होइन, हाम्रो भित्र रोपिएको स्वार्थ–केन्द्रित मानसिकताले पनि देशलाई अस्थिर बनाएको हो,” अध्यक्ष राईले भन्नुभयो, “देशको हितभन्दा पार्टी र व्यक्तिगत लाभलाई ठूलो मान्ने प्रवृत्ति बढ्दै गएपछि राष्ट्र अपेक्षित गतिमा अगाडि बढ्न सकेको छैन।” उहाँले परिवर्तनका नारा धेरै उठे पनि व्यवहार र नेतृत्व शैलीमा रूपान्तरण आउन नसक्दा राष्ट्र पछाडि परिरहेको उल्लेख गर्नुभयो।

मंसिर ७ गते शनिवार आयोजना गरिएको वार्षिकोत्सव समारोहमा सारस्वती माध्यमिक विद्यालयद्वारा पहार ट्रष्ट नेपालको सहकार्यमा स्थापना गरिएको ‘सरस्वती पुस्तकालय’ का साथै अक्षयकोष छात्रवृत्ति वितरण कार्यक्रम समेत सम्पन्न गरिएको थियो ।

शिक्षालाई समृद्धिको जग र चेतनाको स्रोत भन्दै अध्यक्ष राईले अहिलेको शिक्षा प्रणालीमा गुणस्तरीय, व्यवहारिक र नैतिक शिक्षाको अनिवार्य आवश्यकता रहेकोमा जोड दिनुभयो। “नैतिकताको अभावमा प्राप्त भएको शिक्षा कुनै पनि व्यक्तिको चरित्र निर्माणमा असफल हुन्छ र समाजलाई सही दिशातर्फ डोर्याउन सक्दैन,” उहाँले बताउनुभयो। विद्यालय, अभिभावक र समाज सबैले मिलेर नैतिक मूल्यको आधार बलियो बनाउनुपर्ने उहाँको भनाइ थियो ।

वार्षिकोत्सव कार्यक्रम विद्यालय व्यवस्थापन समितिका अध्यक्ष रमेश कुमार राईको अध्यक्षतामा सम्पन्न भएको थियो। कार्यक्रममा साकेला गाउँपालिकाकी पूर्व उपाध्यक्ष सरिता खड्का, गाउँपालिकाका प्रवक्ता तथा वडा नं. ५ का वडाध्यक्ष जीवन खत्री, वडा नं. ३ का वडाध्यक्ष गोविन्द तामाङ, पहार ट्रष्ट नेपालका अध्यक्ष बिजुली बहादुर गुरुङ सहित स्थानीय जनप्रतिनिधि, शिक्षक, विद्यार्थी तथा स्थानीयवासीको सहभागिता उल्लेख्य थियो । कार्यक्रमका क्रममा विद्यालयकी प्रधानाध्यापक सितल राईले वार्षिक प्रतिवेदन प्रस्तुत गर्नुभएको थियो ।

यसैगरी, विद्यालयले वार्षिकोत्सवकै अवसरमा एकल नृत्य, म्युजिकल चेयर र इन–आउट जस्ता विद्यार्थी–केन्द्रित मनोरञ्जनात्मक प्रतियोगिताहरू आयोजना गरेको थियो। विभिन्न विधामा प्रथम, द्वितीय र तृतीय स्थान हासिल गर्ने विद्यार्थीलाई मायाको चिनो तथा सहभागिताको कदरस्वरूप प्रमाणपत्र वितरण गरिएको प्रधानाध्यापक राईले जानकारी दिनुभयो ।