नयाँ व्यवस्थापन समिति चयन

हलेसीन्युजडेस्क, खोटाङ/

पौष २५, शुक्रवार / खोटाङको दिक्तेल रुपाकोट मझुवागढी नगरपालिका–१ दिक्तेल बजारस्थित सरस्वती आधारभूत विद्यालय पोखरीको विद्यालय व्यवस्थापन समितिको अधिवेशन सफलतापूर्वक सम्पन्न भएको छ ।

विध्यालय व्यवस्थापन समितिमा नयाँ नेतृत्व चयनसहित विद्यालयको समग्र शैक्षिक विकास, व्यवस्थापन सुदृढीकरण तथा आगामी योजनाहरू तय गर्ने उद्देश्यसहित आयोजित अधिवेशन विद्यालय परिसरमै सम्पन्न भएको हो । प्रत्येक तीन वर्षमा समिति चयन गर्ने विधानअनुसार भएको अधिवेशनमा विद्यालय परिवार, शिक्षक, अभिभावक, जनप्रतिनिधि तथा स्थानीय समुदायका सरोकारवालाको उल्लेखनीय सहभागिता रहेको थियो ।

अधिवेशनको प्रारम्भमा विद्यालयको शैक्षिक अवस्था, विद्यार्थी संख्या, सिकाइ उपलब्धि, शिक्षक दरबन्दी, भौतिक संरचना तथा चुनौती र सम्भावनाबारे विस्तृत समीक्षा गरिएको थियो । सहभागीहरूले विद्यालयको गुणस्तरीय शिक्षामा अभिभावक र समुदायको सक्रिय भूमिका प्रभावकारी रूपमा अघि बढाउनुपर्ने आवश्यकता औंल्याए ।

अधिवेशनबाट लोकमाया थापा गिताको अध्यक्षतामा नौ सदस्यीय विद्यालय व्यवस्थापन समिति सर्वसम्मत रूपमा चयन भएको छ। नवगठित समितिमा रोहितकुमार सैँजु, केदार खत्री, दिपेन्द्र भट्टराई, सीता अधिकारी तथा अस्मिता विश्वकर्मा सदस्य रहेका छन् । त्यसैगरी पदेन सदस्यका रूपमा वडा शिक्षा संयोजक तथा वडा अध्यक्ष नवराज राई रहने भएका छन् भने शिक्षक प्रतिनिधिका रूपमा मिनबहादुर खत्री चयन भएका छन्। विद्यालयका प्रधानाध्यापक पुष्पलाल राई समितिको सदस्य–सचिवका रूपमा रहनेछन् ।

कार्यक्रममा बोल्ने वक्ताले विद्यालयको शैक्षिक गुणस्तर वृद्धि, बालमैत्री वातावरण निर्माण, नियमित अभिभावक–शिक्षक अन्तरक्रिया, अनुशासन र नैतिक शिक्षा प्रवद्र्धनका विषयमा जोड दिएका थिए। साथै, विद्यालयको भौतिक पूर्वाधार सुधार, कक्षाकोठा व्यवस्थापन, खेलकुद तथा अतिरिक्त क्रियाकलापलाई प्रभावकारी बनाउनुपर्नेमा पनि जोर दिइयो ।

नवनिर्वाचित अध्यक्ष थापा गिताले विद्यालयको सर्वाङ्गीण विकासका लागि सबै सरोकारवालासँग सहकार्य गर्दै अघि बढ्ने प्रतिबद्धता जनाउँदै विद्यालयलाई गुणस्तरीय शिक्षाको केन्द्रका रूपमा विकसित गर्ने लक्ष्य प्रस्तुत गरिन् ।

अधिवेशन सफलतापूर्वक सम्पन्न भएकोमा सहभागीहरूले खुशी व्यक्त गर्दै नवगठित विद्यालय व्यवस्थापन समितिलाई सफल कार्यकालको शुभकामना दिएका छन् ।

स्थानीय समुदायले नयाँ समितिले विद्यालयको शैक्षिक स्तर उकास्न महत्वपूर्ण योगदान पु-याउने विश्वास व्यक्त गरेको छ ।