हलेसीन्युजडेस्क, खोटाङ

खोटाङको दिप्रुङचुइचुम्मा गाउँपालिकाबाट एक टोलि जाजरकोट केन्द्रविन्दु भएर गत कात्तिक १७ गते राति  गएको भूकम्प पीडित परिवारका लागि भौतिक श्रम-सहयोग गर्न जाजरकोट पुगेको छ । दिप्रुङचुइचुम्मा गाउँपालिका वडा नं. ३ छोरम्वुका वडाध्यक्ष भुपेन्द्र बस्नेतको नेतृत्वमा पालिका स्वास्थ्य शाखा अन्तर्गत हेलो डाक्टरका स्वास्थ्यकर्मी शुरेस प्रधान र वडा नं. ४ बतासे इजाराका समिर दंगाल गत ३ गते घरबाट हिडेर ४ गते भूकम्प पीडितको श्रम-सहयोगका लागि जाजरकोटको खलंगा पुगेका हुन ।

गाइघाट, लाहान, बुटवल लमही, सर्खेत हुदै  ४ गते खलंगा पुगेर ५ गतेबाट भेरी नगरपालिका वडा नं. ३ पिपलडाँडामा उहाँहरुले एक घरका लागि अस्थायी आवास निर्माणका काममा जुटिरहनु भएको टोलिका संयोजक वडाध्यक्ष भुपेन्द्र बस्नेतले हलेसी एफएमलाई जानकारी दिनुभयो ।

हलेसी एफएम समाचार शाखाबाट आज विहान ६ वजे वडाध्यक्ष बस्नेतसँग सम्पर्क गर्न खोज्दा उहाँहरु कार्यास्थलमा पुगिसक्नुभएको थाहा भयो ।

हिजो शुरु गरिएको अस्थायी आवास घर आज अपरान्हसम्म  निर्माण गरिसक्ने उहाँले बताउनुभयो ।

उहाँहरुलाई काममा सहयोग दिने थप जनशक्तिमा उदयपुर जिल्ला रोतामाइ गाउँपालिकाका भूतपूर्व शैनिक संघका कृष्णकुमार राई, त्रियुगा नगरपालिकाका दिनेश धामी, धिरेन धामी र राम धामी हुनुहुन्छ ।

‘यतिखेर धेरै जाडो महसुस गर्नु परेको छैन । यहाँको दर्दानक अवस्थाले हामीलाई यहाँ आएर पीडित परिवारका लागि भौतिक उपस्थितिमा केही श्रम-सहयोग गर्न पाउँदा आत्म सन्तुष्टि जागेको छ ।’– वडाध्यक्ष बस्नेतको कथन छ । उहाँका अनुसार खलंगाको भौगोलिक अवस्था निकै कमजोर देखिन्छ । यहाँका सबैघरहरु ध्वस्त भएकाछन् । भूकम्प पीडितका लागि जुटिरहेको सहयोग छिटो र पारदर्शीपूर्ण ढंगबाट पीडितको पहुँचमा पुराउन उहाँको माग छ ।

यस अगाडि दिक्तेल रुपाकोट मझुवागढी नगरपालिका र हलेसीतुवाचुङ नगरपालिकाले आर्थिक सहयोग उपलव्ध गराइसकेका छन् । तर सोही ठाउँमा पुगेर भौतिक श्रमदान मार्फत सहयोग जुटाउने काममा भने हालसम्म खोटाङबाट दिप्रुङचुइचुम्मा गाउपालिका मात्र रहेको छ ।