महिलामा आत्मविश्वास र उद्यमशीलता वृद्धि

हलेसीन्युजडेस्क, खोटाङ/

मंसिर २३, मंगलवार / खोटाङको सदरमुकाम दिक्तेल बजारमा सञ्चालन गरिएको १० दिने मुढा निर्माण सीप विकास तालिम सफलतापूर्वक सम्पन्न भएको छ। कालिका वडास्तरीय महिला समूह, दिक्तेलको पहल तथा टेवा नेपाल, ललितपुरको आर्थिक सहयोगमा  सञ्चालन गरिएको १० दिने मुढा निर्माण सीप विकास तालिमको आज  एक ओैपचारिक कार्यक्रमवीच समापन गरिएको हो ।

कालिका महिला समूहकी अध्यक्ष लोकमाया थापा (गीता) को अध्यक्षता तथा दिक्तेल रुपाकोट मझुवागढी नगरपालिका–१ का वडाध्यक्ष नवराज राईको प्रमुख आतिथ्यतामा सम्पन्न समापन कार्यक्रममा अध्यक्ष थापाले सिकाइलाई व्यवहारमा रुपान्तरण गर्न आवश्यक रहेको धारणा व्यक्त गर्नुभयो। उहाँले भन्नुभयो, “तालिम त सम्पन्न भयो, तर यसले मात्र तपाईंहरू सक्षम हुनुभएको हुँदैन। यहाँ सिक्नुभएको सीपलाई नियमित रूपमा प्रयोग गरी घर–परिवार तथा बजारका लागि आवश्यक सामग्री उत्पादन गर्न सक्नुभएमा मात्र तालिम सार्थक मानिनेछ। अहिले ४० वटा सामग्री प्राप्त भएकोमा २४ वटा मुढाको आकार बनिसकेको छ र १० वटा मुढा पूर्ण रुपमा तयार पनि भइसकेका छन्। यसको निरन्तरता दिन आवश्यक छ।”

कार्यक्रमका प्रमुख अतिथि वडाध्यक्ष राईले महिलाहरूले सिप सिकेर स्वरोजगार बन्ने अवसर थपिने बताउनुभयो। उहाँका अनुसार, “स्थानीय स्रोत र कच्चा पदार्थको सदुपयोग गर्दै महिलाहरूले आर्थिक आयआर्जन गर्न सकून् भन्ने उद्देश्यले तालिम सञ्चालन गरिएको हो। अब सिक्नुभएको सीपलाई आयमूलक उद्यममा रूपान्तरण गर्न पहल गर्नुपर्नेछ। वडा कार्यालयले यस्ता कार्यक्रमलाई निरन्तर सहयोग पु¥याइरहनेछ।”

तालिममा सहभागी महिलाहरूले मुढा बनाउने सीप सिक्न पाएकोमा खुसी र कृतज्ञता व्यक्त गर्नुभयो। दिक्तेल रुपाकोट मझुवागढी नगरपालिका सदस्य तथा तालिममा सहभागी मिना कार्कीले भन्नुभयो—“पहिले मुढा कसरी बनाउने भन्ने थाहा थिएन। अहिले आधारदेखि अन्तिम रूप दिने सीप सिक्न पायौँ। भविष्यमा यही सीपले आय–आर्जनमा सहयोग पुग्ने विश्वास छ।”

उक्त तालिमले स्थानीय महिलाहरूमा आत्मविश्वास, सीप तथा उत्पादनशीलता वृद्धिमा महत्वपूर्ण योगदान पु¥याएको समूहकी सचिव सावित्रा आचार्य ९घिमिरे० ले हलेसी एफएमलाई जानकारी दिनुभयो।

समापन समारोहमा उपस्थित सञ्चारकर्मीहरूलाई मुढा उपहार प्रदान गर्दै सम्मान पनि गरिएको थियो ।

देविस्थान एकता समाज, दिक्तेलको सभा हलमा सञ्चालन गरिएको तालिममा ११ जना स्थानीय महिलाहरूको सहभागिता रहेको थियो। समापन कार्यक्रममा सहभागीहरूको उपस्थितिलाई उत्साहपूर्ण र प्रेरणादायी मानिएको थियो।