हलेसीन्युजडेस्क, खोटाङ /

भाद्र ३१ / खोटाङको दिक्तेल रुपाकोट मझुवागढी नगरपालिकाका नगरप्रमुख तीथराज भट्टराईले काठमाडौं महानगर पालिकाका नगर प्रमुख बालेन्द्र शाह र उपमहानगर पालिका धरानका नगरप्रमुख हर्क साम्पाङ राईवीच पछिल्लो समय देखिएको कटाक्ष र टिक्काटिप्पणीका कारण स्थानीय जनप्रतिनिधिहरुको शीर निहुरिने काम भएको भन्दै यस्तो नगर्न अनुरोध गर्नुभएको छ । मंगलवार (भाद्र३१ गते) आफ्नो सामाजिक सन्जालमार्फत नगरप्रमुख भट्टराईले काठमाण्डौ महानगरपालिकाका नगरप्रमुख शाह र धरान उपमहानगरपालिकाका नगरप्रमुख साम्पाङ राईलाई एक आपसमा कटाक्ष गरेर होईन, अपहेलित र अपमानित भएर होईन, हातेमालो गरेर अघि बढ्न, एकापसमा सम्मान र सद्भाव बाँड्दै सबै जनप्रतिनिधिको नमुना र उदाहरणीय जनप्रतिनिधि बन्न अनुरोध गर्दै अब आयन्दा यस्तो कटाक्ष र टिक्काटिप्पणी नगर्न सार्वजनिक अपिल गर्नुभएको हो ।

नगरप्रमुख  साम्पाङ र नगरप्रमुख शाह

नगरप्रमुख भट्टराईले एकै समयमा निर्वाचित भएर आएका देशभरका प्रमुखहरूले आआफ्नो वुद्धि र विवेकले भ्याएसम्म नागरिकको हितमा काम गर्ने प्रयत्न गरिरहेको साथै जनमुखी र दीर्घकालीन काम गर्ने प्रयत्न भैरहेको भए पनि कानुन अनुसारको काम गर्दागर्दै विभिन्न पालिकामा भ्रष्टाचार, दुराचार र वेथिती बढेको सञ्चार माध्यममा असरल्ल फैलिरहेको उल्लेख गर्नुभएको छ् । 

केही जनप्रतिनिधीहरूले भ्रष्टाचारको आरोपमा कानुनी कारबाही भोगिरहेको छन् भने भविष्यमा दोषी ठहरिनेहरूले पनि कानुनी कठघरामा उभिनुपर्ने उहाँको कथन छ ।

नगरप्रमुख भट्टराईले भदौ २३/२४ गते जेन्जीले भ्रष्टाचारको विरोध गर्दै सुशासन, पारदर्शिता र सरकारद्धारा सामाजिक सञ्जाल बन्द गरिएकोमा त्यसको विरोध स्वरुप प्रदर्शन गरेको आन्दोलनसँगै तत्कालिन सत्तारूढ दलको बहिर्गमन र सुशीला कार्कीको नेतृत्वमा नयाँ सरकार गठन प्रक्रियादेखि नै बालेन्द्र शाह र हर्क साम्पाङ राई वीच सामाजिक सञ्जाल मा अशोभनीय कटाक्ष र टिकाटिप्पणी शुरु हुनुले समग्र जनप्रतिनिधिको छवि र प्रतिष्ठामा असर पु-याएको भन्दै सच्चिन आग्रह गर्नु भएको छ ।

नगरप्रमुख भट्टराई लेख्नुहुन्छ-‘अहिले देश आहत भएकोछ । ७०–७५ जनाको दुःखद् निधन भएको छ । घाइते भएका कतिपय नागरिक मृत्यु र जीवनको दोसाँधमा कष्टपूर्ण ढंगले अस्पतालमा छटपटाई रहेका छन् । छोराछोरीको मृत्युवरणबाट आमा-वुवा वेहोसी अवस्थाबाट भर्खरै बौरिंदै हुनुहुन्छ । ७५३ वटा स्थानीय सरकारमा हामीसँगै एउटै समयमा निर्वाचित हुनुभएको नगर प्रमुख वालेन र हर्क भने सामाजिक संजालबाट भाले जुधाई खेलेर स्थानीय सरकारको गरिमालाई आँच पु-याई रहनु भएको छ । तपाईहरूलाई हामीले जनप्रतिनिधिको नमुना मेयर मानिरहेका छौं र भोलिका दिनमा पनि मान्नेनै छौं तर यस्तै अभिमान र अमर्यादित चरित्र प्रदर्शन गरिरहने हो भने हामीले त के नागरिकबाट समेत तिरस्कार हुने अवस्था आउने छ ।’

नगरप्रमुख भट्टराई लोकतन्त्रको सुन्दर पक्ष असहमतिलाई स्विकार्नु सक्नुपर्छ भन्दै हरेक विवादलाई छलफल र समिक्षा गरेर निकास निकाल्नु सुझाउनुहुन्छ  । उहाँ दुवै नगरप्रमुखहरुलाई देशकै रोलमोडलको रूपमा सधैंभरी मान्ने वातावरण निर्माण गर्नु पनि सल्लाह दिनुहुन्छ ।          

अहिले मुलुक जटिल मोडमा उभिएको, शहीद र घाइते परिवारका सदस्य पीडामा छट्पटाई रहनु भएको र अरबौं रूपैंयाका संरचना ध्वस्त भएको यो अवस्थामा नागरिकहरुको भरोसाको आधार नै हामी हौँ भन्नुहुँदै नगरप्रमुख भट्टराई लेख्नुहुन्छ-‘जिम्मेवार बनौं, हिलो छ्यापाछ्याप होइन, विश्वास र भरोसा पस्किऔं । निराशा होईन, आशा सजाऔं । आआफ्नो पालिकामा भएको स्थानीय उत्पादन र सामग्री गच्छे अनुसार योगदान गरि ध्वस्त संरचनाको पुनःनिर्माणमा योगदान गरौं । वालेन र हर्कजीसम्म यो मेरो अपील पु-याई सहजिकरण गर्दै आत्मावोध गराई दिनुहुन सम्पूर्ण संचार माध्यमलाई हार्दिक अनुरोध गर्दछु ।’