हलेसीन्युजडेस्क, खोटाङ /

खोटाङको दिक्तेल रुपकोट मझुवागढी नगरपालिकाले चित्रकलाको माध्यमबाट खोटाङलाई विश्वसामु परिचित गराउने अभियान अन्तर्गत आजबाट शुरु गरिएको मुन्दुम अन्तराष्ट्रिय चित्रकला प्रदर्शनीको आज एक समारोह वीच उद्धघाटन गरिएको छ । दिक्तेलरुपाकोट मझुवागढी नगरपालिकाका जनप्रतिनिधि, विभिन्न संघसंस्थाका प्रतिनिधिहरु तथा खोटाङे जनसमुदायको चीर प्रतिक्षाका वीच काठमाण्डुस्थित नेपाल आर्ट काउन्सिलमा आयोजना गरिएको प्रदर्शनीस्थलमा आज अपरान्ह करिव १.१५ बजे राष्ट्रपति पौडेलले औपचारिक रुपमा पानसमा वत्ति बालेर क्यानभासमा चित्र कोर्दै १३ दिने चित्रकला प्रदर्शनीको उद्घाटन गर्नुभएको हो ।

               क्यानभासमा चित्र उतार्नुहुदै राष्ट्रपति पौडेल

                     खोटाङ कलाकार समाजद्धारा गीत प्रस्तुत गरिदै

               राष्ट्रपतिद्धारा चित्रहरु समेटिएको क्याटलग ग्रहण गर्नुहुदै

                राष्ट्रपतिद्धारा चित्रहरु अवलोकन गर्नुहुदै

उद्घाटनपूर्व राष्ट्रिय गान बजाइएको थियो । त्यसलगत्तै खोटाङ कलाकार समाजले खोटाङको प्राकृतिकि, भौगोलिक, साँस्कृतिक विशेषता झल्किने गित समूहमा प्रस्तुत गरेको थियो । राष्ट्रपति पौडेलको प्रदर्शनीस्थलमा आगमन हुँदा आ–आफ्नो भेषभुषामा सजिएर खोटाङको साँस्कृतिक झाँकीहरु समेत प्रदर्शनी गरिएका थियो । 

फागनु १७ गतेसम्म चल्ने चित्रकला प्रर्दशनीमा नेपालसहित १४ देशका ख्यातिप्राप्त चित्रकारहरुले खोटाङ जिल्लाका प्रशिद्ध स्थलहरुका साथै विविध साँस्कृतिक, पर्यटकीय एवं त्यहाँको जनजीवन झल्कने २०६ वटा चित्रहरु प्रदर्शनीमा राखिएको दिक्तेल रुपाकोट मझुवागढी नगरपालिकाका मेयर तीर्थराज भट्टराईले बताउनुभयो । नगरपालिकालाई कलाको माध्यमबाट देशविदेशमा चिनाउने लक्ष्यले अन्तर्राष्ट्रिय चित्रकला प्रदर्शनी गरिएको मेयर भट्टराईको भनाई छ । 

उदघाटनमा मेयर भट्टराईले राष्ट्रपति पौडेललाई ५० देशका २०० चित्र, चित्रको व्याख्या, चित्रकारको परिचय समेटिएको क्याटलक बुक हस्तान्तरण गर्नुभएको थियो ।

            प्रदर्शनीस्थलमा राखिएका केही चित्रहरु