हलेसीन्युजडेस्क, खोटाङ /

खोटाङमा निर्धारित समय अगाडि नै काम सम्पन्न गर्ने निर्माण व्यवसायीलाई सम्मान गरिएको छ । जिल्लाभित्र मध्यपहाडी लोकमार्गमा पर्ने दुई वटा पुल समय अगावै निर्माण गर्ने निर्माण व्यवसायीलाई सम्मान गरिएको हो । 

मध्यपहाडी लोकमार्ग अन्तरगत दिक्तेल-चखेवाभञ्ज्याङ सडक खण्डको भालुखोला र छेपेखोलामा निर्माण कार्यको लागि निर्धारित समयसिमाभन्दा एक महिना अगाडि नै पुल निर्माण गर्ने केएम इन्जिनियर्स विल्डर्सका प्रवन्ध निर्देशक मोहन कार्कीलाई जिल्ला समन्वय समिति खोटाङ र दिक्तेल रुपाकोट मझुवागढी नगरपालिकाद्धारा शुक्रवार एक कार्यक्रमका वीच सम्मान गरिएको हो ।

जिल्ला समन्वय समितिको सभाहलमा केएम इन्जिनियर्स विल्डर्सका प्रवन्ध निर्देशक मोहन कार्कीलाई जिल्ला समन्वय समितिका प्रमुख सनबहादुर राई, दिक्तेल रुपाकोट मझुवागढी नगरपालिकाका नगरप्रमुख तीर्थराज भट्टराई लगायतले टोपी र फूलमाला लगाइदिएर सम्मान–पत्र प्रदान गर्नुभएको छ ।

जिल्लाका राजनीतिक दलका प्रमुख तथा प्रतिनिधिको उपस्थितिमा निर्माण व्यवसायीलाई सम्मान गरिएको हो । केएम इन्जिनियर्स विल्डर्सले २०८१ असार २२ गतेसम्ममा सक्नेगरी २०७९ असार २२ गते पुल निर्माण गर्ने सम्झौता गरेको थियो । भालुखोला दिक्तेल रुपाकोट मझुवागढी नगरपालिका–१ सोल्मा र छेपेखोला दिक्तेल रुपाकोट मझुवागढी नगरपालिका–६ नेर्पामा पर्छ ।

धेरै निर्माण व्यवसायीहरुबाट जिल्ला भित्रका आयोजनाहरु समयमा सम्पन्न हुन नसकी अलपत्र भैरहेको कारण जिल्लावासीहरुमा नैराश्यता छाइरहेको वेला केएम इन्जिनियर्स विल्डर्सले समय अगावै काम सम्पन्न गरी थप उत्साह जगाएको हुँदा त्यस्ता निर्माण कम्पनीलाई जनस्तरबाट सम्मान गर्दै सकारात्मक सन्देश प्रवाह होस भनी सम्मान गरिएको जिल्ला समन्वय समिति खोटाङका प्रमुख राई बताउनुहुन्छ ।

यता नगरप्रमुख भट्टराई भन्नुहुन्छ–‘ढिलासुस्ती गर्ने निर्माण व्यवसायीलाई कारबाहीका लागि सिफारिस गरेको नगरपालिकाले समयमा काम सम्पन्न गर्ने निर्माण व्यवसायीलाई भने सम्मान गरेको छ । समय अगावै काम सम्पन्न गर्ने केएम इन्जिनियर्स विल्डर्सलाई सम्मान गरेर इमान्दारिताका साथ काम गर्ने व्यक्ति या संस्थालाई प्रोत्साहन र सम्मान गर्नु पर्दछ भने कामप्रति बेइमान गर्ने संस्था या व्यक्ति दण्डित हुनुपर्छ भन्ने मान्यता स्थापित गर्न चाहेका हौँ ।’

यस अगाडि नगरपालिकाले नगरभित्रका सडक निर्माणमा ढिलासुस्ती गर्ने निर्माण कम्पनीलाई कारबाहीका लागि सिफारिस गर्नेदेखि त्यस्ता व्यवसायीहरुको मेसिनमा ताल्चा समेत लगाएको छ ।

[ यो पनि-सबै निर्माणका कामहरु यस्तै भैदिए.........! }