हलेसीन्युजडेस्क, खोटाङ /

यो वर्षको दसैँ अर्थात् दुर्गापक्षको मुख्य दिन आज विजयादशमीका दिन मान्यजनको हातबाट नवदुर्गाको प्रसादका रुपमा शुभ साइतको प्रतीक रातो टीका एवं समृद्धिको प्रतीक जमरा लगाइँदैछ । 

विजयादशमीमा टीका थाप्न आउनेहरुलाई अग्रज मान्यजनहरुको मुखारविन्दबाट यस्ता मन्त्रहरुका साथ आशिवर्चन दिदै टिका र जमारा लगाइन्छ ।

• आयुद्रोणसुते श्रियं दशरथे शत्रुक्षयं राघवे ।
  ऐश्वर्यं नहुषे गतिश्च पवने मानं च दुर्योधने ।।
  शौर्यं शान्तनवे बलं हलधरे दानं च कुन्तीसुते ।
  विज्ञानं विदुरे भवतु भवतां कीर्तिश्च नारायणे ।।

(द्रोणाचार्यका छोरा अश्वत्थामाको जस्तो आयु होस्, अयोध्याका राजा दशरथको जस्तो श्री होस्, दशरथका छोरा रामको जस्तो शत्रु नाश होस्, राजा नहुषको जस्तो ऐश्वर्य होस्, वायुको जस्तो गति होस्, दुर्योधनको जस्तो मान होस्, भीष्मको जस्तो शुरता होस्, बलरामको जस्तो बल होस्, कुन्तीका छोरा कर्णको जस्तो दानशीलता होस्, विदुरको जस्तो ज्ञान विज्ञान होस्, नारायणको जस्तो कीर्ति होस् )

यो क्षणमा दशैँ घर वा पूजा कोठामा नौ दिनसम्म पूजा आराधना गरिएको प्रसाद मान्यजनको हातबाट लगाइन्छ । साथमा लक्ष्मीका रुपमा नगद दक्षिणा दिने परम्परा पनि छ ।

आज टीका प्रसाद ग्रहण गर्न साइत खोज्नेका लागि नेपाल पञ्चाङ्ग निर्णायक विकास समितिले बिहान ११ः३६ बजेको साइत उत्तम रहेको जनाएको छ ।

विजयादशमी आफैंमा शुभ दिन भएकाले आज टीका लगाउन सामान्य मानिसले साइत खोज्नु नपर्ने समितिका अध्यक्ष प्रा श्रीकृष्ण अधिकारीले जानकारी दिनुभयो ।

आज नभ्याउनेले कोजाग्रत पूर्णिमाका दिनसम्म मान्यजनबाट टीका ग्रहण गर्न सक्नेछन् । 

विजयादशमीको दिन आज चन्द्रमा मकर राशिमा रहेकाले टीका लगाइमाग्ने मानिस पूर्व फर्कनुपर्ने बताउँछन् ।

त्रेता युगमा आजैका दिन भगवान् रामले असत्यको प्रतीक बनेका रावणमाथि विजय प्राप्त गरेकाले त्यही समयदेखि विजयादशमी मनाउन सुरु गरिएको धार्मिक विश्वास छ । यसैले आजको दिनलाई विजयको प्रतीकका रुपमा पनि लिइन्छ ।

[गत वर्षको दशैँ-आज विजयादशमीःनवदुर्गाको प्रसादस्वरुप टीका र जमरा लगाइँदै ]