हलेसीन्युजडेस्क, खोटाङ ।

आषाढ ५, शनिवार । लागुऔषध दुरुपयोग तथा अवैध ओसारपसार विरुद्धको अन्तर्राष्ट्रिय दिवस–२०२६ को अवसरमा खोटाङमा सप्ताहव्यापी जनचेतनामूलक अभियान सुरु गरिएको छ । जिल्ला प्रहरी कार्यालय खोटाङ र जिल्ला प्रशासन कार्यालय खोटाङको संयुक्त आयोजनामा प्रभातफेरी, सचेतनामूलक ¥याली तथा हस्ताक्षर संकलन कार्यक्रममार्फत आजदेखि अभियानको औपचारिक शुभारम्भ गरिएको हो ।

प्रमुख जिल्ला अधिकारी रेखा कँडेलको अध्यक्षतामा सम्पन्न कार्यक्रममा जिल्ला समन्वय समिति खोटाङका प्रमुख सनबहादुर राईको प्रमुख आतिथ्यता रहेको थियो । कार्यक्रममा सहायक प्रमुख जिल्ला अधिकारी कोपिला राई, जिल्ला प्रहरी कार्यालय खोटाङका प्रमुख प्रहरी नायव उपरीक्षक प्रकाश बुढाथोकी, सशस्त्र प्रहरी बल नेपाल नम्बर-७ गुल्म खोटाङका सशस्त्र प्रहरी नायव उपरीक्षक शैलेन्द्र न्यौपाने, जिल्लास्थित सरकारी तथा गैरसरकारी कार्यालयका प्रमुख एवं प्रतिनिधि, जनप्रतिनिधि, शिक्षक-शिक्षिका, विद्यार्थी, सञ्चारकर्मी, सुरक्षाकर्मी तथा सर्वसाधारणको उल्लेखनीय सहभागिता रहेको थियो ।

अभियानअन्तर्गत दिक्तेल बजार क्षेत्रमा प्रभातफेरी तथा सचेतनामूलक ¥याली निकालिएको थियो । सहभागीहरूले “लागुऔषध त्यागौँ, स्वस्थ समाज बनाऔँ, “लागुऔषधलाई होइन, जीवनलाई रोजौँ” लगायतका सन्देश अंकित प्लेकार्ड र ब्यानर प्रदर्शन गर्दै बजार परिक्रमा गरेका थिए । त्यसपछि आयोजित हस्ताक्षर संकलन कार्यक्रममा सहभागीहरूले लागुऔषधमुक्त समाज निर्माणका लागि ऐक्यबद्धता जनाएका थिए ।

कार्यक्रमलाई सम्बोधन गर्दै वक्ताहरूले पछिल्ला वर्षहरूमा विशेषगरी किशोर–किशोरी र युवापुस्तामाझ लागुऔषध दुव्र्यसन गम्भिर सामाजिक चुनौतीका रूपमा बढ्दै गएको बताएका थिए। लागुऔषधको प्रयोगले व्यक्ति, परिवार र समाजमा सामाजिक, आर्थिक, मानसिक तथा स्वास्थ्यसम्बन्धी दीर्घकालीन नकारात्मक असर पार्ने भएकाले यसको रोकथामका लागि व्यापक जनचेतना आवश्यक रहेको उनीहरूको भनाइ थियो ।

उनीहरूले लागुऔषध नियन्त्रण सुरक्षा निकायको मात्र जिम्मेवारी नभई अभिभावक, विद्यालय, स्थानीय तह, सामाजिक संघसंस्था, सञ्चारमाध्यम तथा सम्पूर्ण नागरिकको साझा दायित्व भएकोमा जोड दिएका थिए। युवालाई सिर्जनात्मक, उत्पादनमुखी र सकारात्मक गतिविधितर्फ आकर्षित गर्दै लागुऔषध दुर्व्यसनबाट जोगाउन सबै सरोकारवालाबीच प्रभावकारी समन्वय र सहकार्य अपरिहार्य रहेको उनीहरूको धारणा थियो ।

जिल्ला प्रहरी कार्यालय खोटाङका अनुसार सप्ताहव्यापी अभियानअन्तर्गत जिल्लाका विभिन्न विद्यालय, समुदाय तथा स्थानीय तहमा लागुऔषध दुव्र्यसनविरुद्ध अभिमुखीकरण, अन्तरक्रिया, सचेतनामूलक कक्षा, ¥याली, छलफल तथा विविध जनचेतनामूलक कार्यक्रम सञ्चालन गरिनेछ। अभियानले विशेषगरी किशोर/किशोरी तथा युवालाई लागुऔषधका दुष्परिणामबारे सचेत गराउँदै लागुऔषधमुक्त समाज निर्माणमा सकारात्मक योगदान पु-याउने विश्वास गरिएको छ ।

हरेक वर्ष जुन २६ का दिन विश्वभर मनाइने लागुऔषध दुरुपयोग तथा अवैध ओसारपसार विरुद्धको अन्तर्राष्ट्रिय दिवसलाई लक्षित गरी सञ्चालन गरिएको यो सप्ताहव्यापी अभियानले खोटाङमा लागुऔषधविरुद्ध सामूहिक अभियानलाई थप प्रभावकारी बनाउँदै सुरक्षित, सभ्य र लागुऔषधमुक्त समाज निर्माणमा सबै नागरिकलाई एकजुट हुन प्रेरित गर्ने अपेक्षा गरिएको आयोजकले जनाएको छ ।