हलेसीन्युजडेस्क, खोटाङ /

पौष ११, शुक्रवार / प्लाष्टिकजन्य फोहोरका कारण वातावरणमा परिरहेको असर न्यूनीकरण गर्ने उद्देश्यले वन अनुसन्धान तथा प्रशिक्षण केन्द्रको सभाहलमा पौष ११ गते शुक्रवार एक वृहत छलफल कार्यक्रम सम्पन्न भएको छ । केन्द्रका महानिर्देशक डा. राजेन्द्र केसीको अध्यक्षतामा सम्पन्न उक्त कार्यक्रममा प्लाष्टिकजन्य फोहोर व्यवस्थापन तथा न्यूनीकरणका लागि दीर्घकालीन रणनीति र आगामी मार्गचित्र निर्माणबारे गहिरो छलफल गरिएको हो ।

वातावरण विभागको अग्रसरतामा आयोजना गरिएको छलफल कार्यक्रममा वातावरण विकास, उद्योग विकास, सहरी विकास तथा भवन निर्माण विकास, खानेपानी तथा ढल व्यवस्थापन विकाससँग सम्बन्धित सरकारी निकायका प्रतिनिधिहरूको सहभागितामा पुनः अर्को बैठक बस्ने निर्णय भएको थियो । पछि बस्ने बैठकमा स्थानीय तहअन्तर्गतका उद्योगसँग सम्बन्धित संघ–संस्था, निजी क्षेत्र, गैरसरकारी संघ–संस्था तथा प्लाष्टिकजन्य फोहोर व्यवस्थापनसँग प्रत्यक्ष सरोकार राख्ने विभिन्न निकायका प्रतिनिधिहरूले छलफलमा सहभागिता जनाउनेभएका छन् । 

छलफलमा प्लाष्टिक प्रयोग न्यूनीकरण, पुनः प्रयोग तथा पुनः प्रशोधन (रिसाइकल) प्रवद्र्धन, स्थानीय तहको भूमिकालाई प्रभावकारी बनाउने, जनचेतना अभिवृद्धि गर्ने तथा नीति–नियम कार्यान्वयनलाई थप सुदृढ बनाउने विषयमा रणनीति बनाउनका लागि आ–आफ्ना धारणा राखेका थिए । साथै, प्लाष्टिकजन्य फोहोर व्यवस्थापनमा संघ, प्रदेश र स्थानीय तहबीच समन्वय आवश्यक रहेकोमा जोड दिइएको थियो ।

कार्यक्रममा दिक्तेल रुपाकोट मझुवागढी नगरपालिकाका नगरप्रमुख तीर्थराज भट्टराईले स्थानीय तहमा प्लाष्टिक फोहोर व्यवस्थापन चुनौतीपूर्ण बन्दै गएको उल्लेख गर्दै यसको दीर्घकालीन समाधानका लागि केन्द्र र स्थानीय तहबीच सहकार्य आवश्यक रहेको बताउनुभयो । यस्तै, वातावरण विभागका महानिर्देशक ज्ञानराज सुवेदीले प्लाष्टिकजन्य फोहोर न्यूनीकरणका लागि व्यवहारिक र कार्यान्वयनयोग्य नीति तथा कार्ययोजना तयार गर्न सरकार प्रतिबद्ध रहेको स्पष्ट पार्नुभयो ।

छलफल कार्यक्रममा वातावरण विभागका सिडिके दिपक ज्ञवालीलगायत विभिन्न विज्ञहरूले  प्लाष्टिक फोहोर न्यूनिकरणका लागि नवीन उपाय, प्रविधि प्रयोग र जनसहभागितामूलक कार्यक्रम आवश्यक रहेको धारणा व्यक्त गरेका थिए ।

छलफलबाट प्राप्त सुझाव र निष्कर्षका आधारमा प्लाष्टिकजन्य फोहोर न्यूनीकरणका लागि आगामी दिनमा ठोस मार्गचित्र तयार पार्ने वातावरण विभागले जनाएको छ ।
बन अनुसन्धान तथा प्रशिक्षण केन्द्रको महानिर्देशक डा. राजेन्द्र केसीको अध्यक्षतामा सम्पन्न छलफल कार्यक्रममा दिक्तेल रुपाकोट मझुवागढी नगरपालिकाका नगरप्रमुख तीर्थराज भट्टराई, वातावरण विभागका महानिर्देशक ज्ञानराज सुवेदी,वातावरण विभागका सिडिके दिपक ज्ञवाली लगायत सराकारवालाहरुको उपस्थिति रहेको थियो ।

वातावरण विभागले समन्वय गरेर छिट्टै नै सबै  पक्षसँगको बैठक बोलाएर कार्यान्वयनमा जाने नगर प्रमुख भट्टराईले बताउनुभयो । नगर प्रमुख भट्टराईले आमरण अनसनका क्रममा फ्लाष्टिक व्यवस्थापनको मुद्दा पनि जोडदार रूपमा उठाउनु भएको थियो ।