सरकारलाई नैतिक दवाव सिर्जना गर्न साउन ११ देखि भोक हड्ताल

हलेसीन्युजडेस्क, खोटाङ/

खोटाङको दिक्तेल रूपाकोट मझुवागढी नगरपालिकाका नगरप्रमुख तीर्थराज भट्टराई बाँस र परम्परागत सामग्रीको संरक्षण तथा प्रवर्द्धनका लागि सरकारलाई दवाव सिर्जना गर्न काठमाडौं प्रस्थान गर्नुभएको छ । बाँस र बाँसजन्य सामग्रीलाई राष्ट्रिय नीतिमा समावेश गरिनुपर्ने मागसहित उहाँले साउन ११ गतेदेखि माइतीघर मण्डलामा भोक हड्ताल सुरु गर्ने घोषणा गर्नुभएको छ ।

नगर प्रमुख भट्टराई आइतबार बिहान बाँस, गुन्द्री, राडी लगायत परम्परागत सामग्री बोकेर काठमाडौंतर्फ हिँड्नुभएको हो । उहाँले नेपालमा प्रशस्त मात्रामा पाइने बाँसको उपयोगमार्फत स्थानीय उत्पादन, रोजगारी र आर्थिक समृद्धिको मार्ग प्रशस्त गर्न सकिने बताउँदै संघीय सरकारलाई नीतिगत निर्णय लिन आग्रह गर्नुभएको छ । “जताततै पाइने बाँसलाई उपयोग गरेर आर्थिक आम्दानी लिने वातावरण बनाउनुपर्ने बेला भएको छ,” उहाँले भन्नुभयो, “तर अहिलेसम्म त्यसतर्फ गम्भीर ध्यान नदिएको कारण हामी बाध्य भएर सत्याग्रहमा उत्रिन लागेका हौँ ।”

तीन दिनसम्मको भोक हड्तालबाट पनि सरकार मौन बस्यो भने उहाँले साउन १४ गतेदेखि आमरण अनशन सुरु गर्ने चेतावनीसमेत दिनुभएको छ । भोक हड्ताल साउन ११ देखि १३ गतेसम्म बिहान ९ बजेदेखि साँझ ५ बजेसम्म हुने जानकारी गराइएको छ ।

बाँसजन्य सामाग्रीहरुको प्रवद्र्धन गर्दै स्थानीय श्रोत साधानहरुको उपयोगबाट आर्थिक समृद्धि गर्ने उद्धेश्यले नगरप्रमसख भट्टराई आफू निर्वाचित भएदेखि नै बाँसबाट निर्मित सामाग्रीहरुको प्रयोगलाई प्राथमिकता दिैदै आइरहनुभएको छ । आफ्नो कार्यकक्षमा प्रयोग हुने फर्निचर लगायत सामाग्रीहरु समेत बासबाट निर्माण गरिएको छ । सरकारको नीति नियम बन्न नसक्दा बाँस जन्य उध्योग तथा बाँसको प्रयोगमा समेत उचित नम्र्सको आधारमा मूल्य निर्धारण नहुदा व्यवहारिक समस्या आइपरेको भन्दै नगरप्रमुख भट्टराई यस सम्बन्धमा ठोस नीति नियम तर्जुमा गर्न सरकारलाई दवाव सिर्जनाका लागि आमरण अनसन समेत बस्ने तयारीका साथ काठमाण्डौ लाग्नुभएको बताइन्छ ।