हलेसीन्युजडेस्क, खोटाङ ।

आषाढ ५, शुक्रवार । खोटाङको दिक्तेलस्थित सरस्वती माध्यमिक विद्यालय अन्तर्गतको सरस्वती स्काउट ट्रुपले नेपाल स्काउटको ७५औँ स्थापना दिवसको अवसरमा वातावरण संरक्षणलाई प्राथमिकता दिँदै मझुवा कालिका देवीस्थान परिसरमा सरसफाइ, फूलबारी निर्माण तथा गोडमेल कार्यक्रम सम्पन्न गरेको छ । नेपाल स्काउटको ७५ औँ स्थापना दिवसको अवसरमा सरस्वती माध्यमिक विद्यालय अन्तर्गतको सरस्वती स्काउट ट्रुपले आज दिक्तेल हाटडाँडा प्रवेशद्धारदेखि मझुवाकालिका देविथान परिसर रोपिएका फूलहरु गोडमेल तथा सरसफाइ कार्यक्रम सम्पन्न गरेको हो ।

विद्यालयका प्रअ शिवहरी ढकालका अनुसार स्थापना दिवसलाई केवल औपचारिकतामा सीमित नराखी समाज र वातावरणसँग जोड्ने उद्देश्यले उक्त कार्यक्रम आयोजना गरिएको हो । कार्यक्रममा स्काउटका विद्यार्थी, शिक्षक, विद्यालय परिवार, स्थानीय बुद्धिजीवी, समाजसेवी तथा समुदायका विभिन्न व्यक्तिहरूको उत्साहजनक सहभागिता रहेको थियो ।

सहभागीहरूले सामूहिक श्रमदानमार्फत देवीस्थान परिसरको सरसफाइ गर्नुका साथै फूलबारी निर्माण, बिरुवा गोडमेल तथा परिसरलाई थप स्वच्छ, हराभरा र आकर्षक बनाउने कार्य गरेका थिए । धार्मिक तथा सार्वजनिक स्थलको संरक्षणसँगै वातावरणीय स्वच्छता प्रवद्र्धनमा कार्यक्रमले महत्वपूर्ण योगदान पु¥याएको सहभागीहरुको विश्वास छ ।

कार्यक्रमका क्रममा स्काउटका विद्यार्थीहरूले स्वयंसेवाको भावना, सामाजिक उत्तरदायित्व तथा सार्वजनिक सम्पत्तिको संरक्षण सबै नागरिकको साझा दायित्व भएको सन्देशसमेत दिएका छन् । उनीहरूको सक्रिय सहभागिताले समाजमा सकारात्मक परिवर्तनका लागि युवाहरूको भूमिका महत्वपूर्ण रहेको सन्देश प्रवाह गरेको बताइन्छ ।

प्रअ ढकालले यस्ता गतिविधिले विद्यार्थीहरूमा अनुशासन, नेतृत्व क्षमता, सामाजिक सेवाको भावना, वातावरण संरक्षणप्रतिको जिम्मेवारी तथा सामूहिक रूपमा काम गर्ने संस्कारको विकास हुने विश्वास व्यक्त गर्नुभयो । उहाँले आगामी दिनमा पनि स्काउटमार्फत यस्ता रचनात्मक तथा समाजोपयोगी कार्यक्रमलाई निरन्तरता दिइने जानकारी दिनुभयो ।

नेपाल स्काउटले स्थापना कालदेखि नै रक्तदान जस्ता मानव सेवामूलक कार्यक्रममन अतिरिक्त अनुशासन, नेतृत्व विकास, स्वयंसेवा, वातावरण संरक्षण तथा सामाजिक सेवाका विभिन्न क्षेत्रमा महत्वपूर्ण योगदान पु-याउँदै आएको छ ।